ת̇ם כלם אללה מוסי תכלימא
אנתקם נקמה בני אסראיל מן אלמדיניין ובעד ד̇לך תנצ̇ם אלי קומך
פקאל מוסי לקומה ג̇רדו מנכם רג̇אלא ללג̇יש יגזון אלמדין ליחלו נקמה אללה בהם
אלפא מן כל סבט מן אסבאט בני אסראיל תבעת̇ו בהם ללגזו
פאנמאז מן אלוף אלאסראיל אלף מן כל סבט פצארו את̇ני עשר אלפא מג̇רדין ללגזו
פבעת̇ בהם מוסי אלפא מן סבט ללגזו ובפינחס אבן אלעזר אלאמאם ללגזו ואניה אלקדס ואבואק אלתג̇ליב בידה
פגזו אלמדין כמא אמר אללה מוסי וקתלו כל רג̇ל
וקתלו כ̇מסה מלוך מדין מע קתלאהם אוי ורקם וצור וחור ורבע ואיצ̇א בלעם אבן בעור קתלוה באלסיף
פסבי בנו אסראיל נסא מדין ואטפאלהם וג̇מיע בהאימהם ומואשיהם ואת̇את̇הם גנמו
וג̇מיע קראהם מע מסאכנהם וקצורהם אחרקוהא באלנאר
ואכ̇ד̇ו ג̇מיע אלסלב ואלפי מן אלנאס ואלבהאים
וג̇או אלי מוסי ואלעזר אלאמאם ואלי ג̇מאעה בני אסראיל באלסבי ואלפי ואלנהב אלי אלעסכר אלי בידאת מואב אלתי עלי ארדן ירחו
פכ̇רג̇ מוסי ואלעזר אלאמאם ואשראף אלג̇מאעה תלקאהם אלי כ̇ארג̇ אלעסכר
פסכ̇ט מוסי עלי אלמוכלין באלג̇יש ריסא אלאלוף וריסא אלמיין אלג̇איין מן גזאה אלחרב
וקאל להם מוסי הל אסתבקיתם כל אנת̇י
אליס הן לבני אסראיל בקול בלעם חתי אוקען נכת̇א באללה בסבב פעור פחל אלובא בג̇מאעה אללה
פאלאן אקתלו כל ד̇כר מן אלאטפאל וכל מראה ערפת מצ̇אג̇עה אלרג̇ל
וסאיר אטפאל אלנסא אלתי לם יערפן מצ̇אג̇עה אלרג̇אל אסתבקוהן לכם
ואנתם פאנזלו כ̇ארג̇ אלעסכר סבעה איאם כל מן קתל נפסא וכל מן דנא בקתיל פתתד̇כו פי אליום אלת̇אלת̇ ופי אליום אלסאבע אנתם וסביכם
וכל ת̇וב ואניה מן ג̇לוד ומעמול מן מרעז ואניה כ̇שב תד̇כוה
ת̇ם קאל אלעזר אלאמאם לרג̇אל אלגזאה אלג̇איין מן אלחרב הד̇א רסם אלשריעה אלתי אמר אללה בהא מוסי
אמא אלד̇הב ואלפצ̇ה ואלנחאס ואלחדיד ואלקלעי ואלאסרב
פכל שי ימכן אן ידכ̇ל אלנאר אמרוה פי אלנאר פיטהר ואיצ̇א יד̇כא במא אלנצ̇ח וכל מא לא ידכ̇ל אלנאר אמרוה פי אלמא
ואגסלו ת̇יאבכם פי אליום אלסאבע ואטהרו ובעד ד̇לך תדכ̇לון אלי אלעסכר
ת̇ם קאל אללה למוסי קאילא
ארפע ג̇מלה מא פי אלסבי מן אלנאס ואלבהאים אנת ואלעזר אלאמאם וריסא אבא אלג̇מאעה
ואקסם ד̇לך בין אהל אלחרב אלכ̇ארג̇ין ללגזו ובין סאיר אלג̇מאעה
וארפע מכ̇סא ללה מן אהל אלחרב אלכ̇ארג̇ין ללגזו ראסא ואחדא מן כל כ̇מס מאיה מן אלנאס ואלבקר ואלחמיר ואלגנם
וכ̇ד̇ו ד̇לך מן קסמהם רפיעה ללה ואדפע ד̇לך אלי אלעזר אלאמאם
וכ̇ד̇ מן קסם בני אסראיל ואחדא מן כ̇מסין מן אלנאס ואלבקר ואלחמיר ואלגנם וסאיר אלבהאים ואדפע ד̇לך אלי אלליואניין חאפט̇י מחפט̇ מסכן אללה
פצנע מוסי ואלעזר אלאמאם כמא אמר אללה מוסי
פכאן אלפי ג̇מלה אלגנימה אלתי גנמהא קום אלגזו עדד אלגנם סתמאיה אלף וכ̇מסה וסבעון אלפא
ועדד אלבקר את̇נאן וסבעון אלפא
ועדד אלחמיר אחד וסתון אלפא
ומן אלנאס מן אלנסא אלתי לם יערפן מצ̇אג̇עה אלרג̇ל את̇נאן ות̇לאת̇ון אלפא
פכאן נצף ד̇לך והו נציב אלד̇ין כ̇רג̇ו ללגזו עדד אלגנם ת̇לאת̇מאיה אלף וסבעה ות̇לאת̇ין אלפא וכ̇מס מאיה
פכאן עדד אלמכ̇ס ללה מן אלגנם סתמאיה וכ̇מסה וסבעין ראסא
ואד̇ אלבקר סתה ות̇לאת̇ון אלפא פמכ̇סהא ללה את̇נאן וסבעון
ואד̇ אלחמיר ת̇לאת̇ון אלפא וכ̇מסמאיה פמכ̇סהא ללה אחד וסתון
ואד̇ אלנאס סתה עשר אלפא פמכ̇סהא ללה את̇נאן ות̇לאת̇ון ראסא
פדפע מוסי אלמכ̇ס אלמרפוע ללח אלי אלעזר אלאמאם כמא אמרה אללה
ועדד קסם בני אסראיל אלד̇י קסמה מוסי מן קום אלגזאה
פכאן ד̇לך מן אלגנם ת̇לאת̇ מאיה אלף וסבעה ות̇לאת̇ין אלפא וכ̇מס מאיה
ומן אלבקר סתה ות̇לאת̇ין אלפא
ומן אלחמיר ת̇לאת̇ין אלפא וכ̇מס מאיה
ומן אלנאס סתה עשר אלפא
פאכ̇ד̇ מוסי מן ד̇לך ואחדא מן כל כ̇מסין מן אלנאס ואלבהאים ודפעה אלי אלליואניין חאפט̇י מחפט̇ מסכן אללה כמא אמרה
ת̇ם תקדם אלי מוסי אלמוכלון באלוף אלג̇יש ריסא אלאלוף וריסא אלמיין
פקאלו לה עבידך רפעו ג̇מלה אהל אלחרב אלד̇ין מענא פלם יפתקד מנא רג̇ל
וקד קרבנא קרבאנא ללה אי רג̇ל מנא וג̇ד אניה ד̇הב מן דמלג וסואר וחלקה ותרכי וחקאב לנסתגפר ען נפוסנא בין ידי אללה
פקבץ̇ מוסי ואלעזר אלאמאם אלד̇הב מנהם כל אניה מצוגה
פכאן ג̇מלה ד̇הב אלרפיעה אלד̇י רפעוה ללה סתה עשר אלפא וסבע מאיה וכ̇מסין מת̇קאלא מן ריסא אלאלוף ואלמיין
ואמא סאיר אהל אלחרב פמא גנמה כל ואחד כאן לה
ולמא אכ̇ד̇ מוסי ואלעזר אלאמאם אלד̇הב מן ריסא אלאלוף ואלמיין אתו בה אלי כ̇בא אלמחצ̇ר ד̇כרא לבני אסראיל בין ידי אללה