ת̇ם אקאם אלאסראיל פי שטים ובדא אלקום אן יזאנו בנאת מואב
פדעון באלקום אלי ד̇באיח מעבודאתהם פאכלו מנהא וסג̇דו להא
פלאזם אלאסראיל פעור אלצנם ואשתד גצ̇ב אללה עליהם
פקאל אללה למוסי כ̇ד̇ מעך ריסא אלקום ואצלבהם ללה חד̇א אלשמס תרג̇ע שדה גצ̇בה ען אלאסראיל
פקאל מוסי לחכאמהם ליקתל כל רג̇ל מן פי נאחיתה מן מלאזמי פעור אלצנם
ואד̇א ברג̇ל מן בני אסראיל קד אקבל וקדם אלי מא בינהם מראה מדיניה בחצ̇רה מוסי וג̇מאעתהם והם יבכון ענד באב כ̇בא אלמחצ̇ר
פלמא ראי פינחס אבן אלעזר אבן הרון אלאמם קאם מן וסט אלג̇מאעה ואכ̇ד̇ רמחא בידה
ודכ̇ל וראה אלי אלקבה פטענהמא ג̇מיעא אלרג̇ל ואלמראה פי בטנהא פאנחבס אלובא ען בני אסראיל
פכאן עדד מן מאת באלובא ארבעה ועשרין אלפא
וכלם אללה מוסי קאילא
אן פנחס אבן אלעזר אבן הרון אלאמאם רד חמיתי ען בני אסראיל במא גאר לי פי מא בינהם חתי לם אפנהם בעקאבי
פלד̇לך קל לה אני מעטיה עהדי סלאמה
יכון לה ולנסלה בעדה עהד אמאמה אלדהר בדל מא גאר לרבה וכפר ען בני אסראיל
וכאן אסם אלרג̇ל אלאסראילי אלמקתול אלד̇י קתל מע אלמדיניה זמרי אבן סלוא שריף בית אבאיה אלשמעוני
ואסם אלמראה אלמדיניה אלמקתולה כזבי אבנה צור והו רייס אהל בית מן אמתה במדין
ת̇ם כלם אללה מוסי תכלימא
חאצר אלמדיניין חתי תקתלוהם
לאנהם אעדא לכם באגתיאלהם אלד̇י אגתאלוכם בסבב פעור ובסבב כזבי אבנה שריף מדין אכ̇תהם אלמקתולה פי יום אלובא בסבב פעור