וכלם אללה מוסי קאילא
מר אלעזר אבן הרון אלאמאם באן ירפע אלמג̇אמר מן בין אלמחרקין וידירי אלנאר הנאך לאנהא קד תקדסת
פאמא מג̇אמר אולאיך אלמכ̇טיין עלי נפוסהם פיצנעוהא צפאיח רקאקא גשאא ללמד̇בח פאנהם למא קדמוהא בין ידי אללה קד תקדסת ותציר עלאמה לבני אסראיל
פאכ̇ד̇ אלעזר אלאמאם אלמג̇אמר אלנחאס אלתי קדמוהא אלמחרקון פארקוהא צפאיח ללמד̇בח
ד̇כרא לבני אסראיל לכי לא יתקדם רג̇ל אג̇נבי מן ליס הו מן נסל הרון ליבכ̇ר בכ̇ורא בין ידי אללה ולא יכון כקרח וג̇מועה כמא נזל אללה עלי יד מוסי פיה
ותדמרת ג̇מאעה בני אסראיל מן גד עלי מוסי והרון קאילין אנתמא קתלתמא מן אמה אללה
פלמא תג̇וקו עליהמא אלתפתו אלי כ̇בא אלמחצ̇ר פאד̇א בנור אללה קד ט̇הר פי אלגמאם
פתקדם מוסי והרון בין ידי כ̇בא אלמחצ̇ר
וכלם אללה מוסי קאילא
אן ארתפעתמא מן בין הד̇ה אלג̇מאעה אפניתהם כטרפה פוקעא עלי וג̇וההמא
וקאל מוסי להרון כ̇ד̇ אלמג̇מרה ואג̇על עליהא נארא מן פוק אלמד̇בח ואלק בכ̇ורא ואד̇הב בה מסרעא אלי אלג̇מאעה ואסתגפר ענהם פאן אלסכ̇ט קד כ̇רג̇ מן בין ידי אללה וקד בדא בהם אלצדאם
פאכ̇ד̇ ד̇לך הרון כמא קאל מוסי וחאצ̇ר אלי וסט אלג̇וק פאד̇א באלובא קד אבתדא בהם פבכ̇ר אלבכ̇ור ואסתגפר ענהם
ווקף בין אלמותי ואלאחיא פאנחבס אלובא
פכאן עדד מן מאת בד̇לך אלובא ארבעה עשר אלפא וסבע מאיה סוי מן מאת בסבב קרח
ורג̇ע הרון אלי מוסי אלי באב כ̇בא אלמחצ̇ר וקד אנחבס אלובא
ת̇ם כלם אללה מוסי קאילא
מר בני אסראיל וכ̇ד̇ מנהם עצא עצא לכל בית מן אשראפהם לביות אבאיהם יכון ד̇לך את̇נתא עשרה עצא ואכתב אסם כל רג̇ל עלי עצאה
ואסם הרון פאכתבה עלי עצאה לוי לאנך אנמא תאכ̇ד̇ עצא ואחדה לג̇מלה ביות אבאיהם
וצ̇עהא פי כ̇בא אלמחצ̇ר בין ידי אלשהאדה אלתי אחצ̇רך הנאך
פאלרג̇ל אלד̇י אכ̇תארה תפרע עצאה חתי אהדי עני תדמר בני אסראיל אלד̇ין הם מתדמרון עליכם
פכלם מוסי בני אסראיל פדפע אליה כל אשראפהם עצא מן כל שריף לביות אבאיהם את̇נתא עשרה עצא ועצאה הרון פימא בינהם
פוצ̇עהא מוסי בין ידי אללה פי כ̇בא אלשהאדה
פלמא כאן מן גד דכ̇ל מוסי אלי כ̇בא אלשהאדה פאד̇א קד פרעת עצאה הרון אלתי הי לבית לוי פאכ̇רג̇ת פרועא ונורת נוארא ועקדת לוזא
ת̇ם אכ̇רג̇ מוסי ג̇מיע אלעצא מן בין ידי אללה אלי ג̇מיע בני אסראיל פנט̇ר כל ואחד אלי עצאה פאכ̇ד̇הא
ת̇ם קאל אללה למוסי רד עצא הרון בין ידי אלשהאדה תכון חפט̇ עלאמה לד̇וי אלכ̇לף פיפנא תדמרהם עלי ולא יהלכון
פצנע מוסי כמא אמרה אללה מן ד̇לך
ת̇ם קאל בנו אסראיל למוסי הוד̇א תופי מנא ובאד מנא פכלנא האלכון
ואד̇א כאן כל מן תקדם אלי מסכן אללה יהלך פהא נחן פאנון מתופון