והד̇ה שריעה קרבאן אלאת̇ם הו איצ̇א מן כ̇ואץ אלאקדאס
פי מוצ̇ע תד̇בח אלד̇כוה יד̇בח קרבאן אלאת̇ם ודמה ירש עלי אלמד̇בח מסתדירא
וג̇מיע שחמה ירפעה מנה אלאליה ואלת̇רב אלמגטי אלג̇וף
ואלכליתין ואלשחם אלד̇י עליהמא אלד̇י עלי אלאחשא וזיאדה אלכבד מע אלכליתין ינזעהא
ויקתרהא אלאמאם עלי אלמד̇בח קרבאנא ללה כד̇אך מא יציר קרבאן אלאת̇ם
כל ד̇כר מן אלאימה יאכלה ופי מוצ̇ע מקדס יוכל לאנה מן כ̇ואץ אלקדאס
כאלד̇כוה קרבאן אלאת̇ם שריעה ואחדה להמא אלאמאם אלד̇י יגפר בה לה יכון
ואלאמאם אד̇א קרב צעידה אנסאן פג̇לדהא בעד תקריבהא יכון לה
וכל הדיה ממא יכ̇בז פי אלתנור או יעמל פי טנג̇יר או עלי טאבק אי אמאם קרבהא לה תכון
וכל הדיה מלת̇ות̇ה בדהן או ג̇אפה לג̇מיע בני הרון תכון לאלואחד כאלאכ̇ר
והד̇ה שריעה ד̇בח אלסלאמה אלד̇י יקרבה ללה
ואן קרבה עלי שכר פליקרב מעה ג̇ראדק פטיר מלת̇ות̇ה בדהן ורקאק פטיר ממסוחה בדהן וסמיד רפך̇ ג̇ראדק מלת̇ות̇ה בדהן
מע ג̇ראדק כ̇בז כ̇מיר יקרב קרבאנה מע ד̇בח שכר סלאמתה
פליקרב מן ד̇לך ואחדא מן כל קרבאן רפיעה ללה ללאמאם אלד̇י ינצ̇ח דם אלסלאמה לה יכון
ולחם ד̇בח שכר אלסלאמה פי יום קרבאנה יוכל לא יבק מנה אלי אלגדאה
ואן כאן ד̇בח קרבאנה נד̇רא או תברעא פליוכל פי יום תקריבה ומן אלגד פמא פצ̇ל מנה יוכל
ואלפאצ̇ל מן לחם אלד̇בח אלי אליום אלת̇אלת̇ פליחרק באלנאר
פאן אכל מנה פי אליום אלת̇אלת̇ פלא ירתצ̇י אלמקרב לה לא יחסב לה בל יכון כאלאכ̇ס ואי אנסאן אכל מנה פקד חמל וזרה
ולחם אלאקדאס אן דנא בשי מן אלנג̇אסאת פלא יוכל בל יחרק באלנאר ואלטאהר מנה פלא יאכלה אלא טאהר
ואי אנסאן אכל לחמא מן ד̇בח אלסלאמה אלד̇י ללה ונג̇אסתה עליה פינקטע ד̇לך אלאנסאן מן קומה
ואי אנסאן לאמס שיא מן אלנג̇אסאת בנג̇אסה אנסאן או בבהימה נג̇סה או בשי מן אלדביב אלנג̇ס פאכל מן ד̇בח אלסלאמה אלד̇י ללה פינקטע איצ̇א ד̇לך אלאנסאן מן קומה
ת̇ם כלם אללה מוסי קאילא
מר לבני אסראיל קאילא כל שחם בקר וצ̇אן ומאעז לא תאכלוה
ושחם אלנבילה ואלסקימה אסתעמלוה פי כל צנעה ואכלא לא תאכלוה
פאן כל מן יאכל שחמא מן אלבהימה אלתי יקרב מנהא קרבאן ללה ינקטע ד̇לך אלאנסאן אלאכלה מן קומה
וכל דם לא תאכלוה פי ג̇מיע מסאכנכם מן אלטאיר ואלבהאים
אי אנסאן אכל שיא מן אלדם ינקטע ד̇לך אלאנסאן מן קומה
ת̇ם כלם אללה מוסי קאילא
מר בני אסראיל וקל להם אלמקרב ד̇בח סלאמה ללה הו אלד̇י יאתי בקרבאנה ללה מן ד̇בח אלסלאמה
ידאה תחמל קראבין אללה אלשחם מע אלקץ יאת בה מעה פיחרכה תחריכא ללה
ויקתר אלאמאם אלשחם עלי אלמד̇בח ת̇ם יציר אלקץ להרון ובניה
ואלסאק אלאימן אעטוה רפיעה ללאמאם מן ד̇באיח סלאמתכם
ואלמקרב דם אלסלאמה ואלשחם מן בני הרון לה יכון אלסאק אלאימן נציבא
לאן קץ אלתחריך וסאק אלרפיעה אכ̇ד̇תהמא מן בני אסראיל מן ד̇באיח סלאמתהם ואעטיתהמא להרון אלאמאם ובניה רסם אלדהר מן בני אסראיל
הד̇ה חצה הרון ובניה מן קראבין אללה מן יום קדמו ליאמו לי
אלתי אמר אללה בהא אן יעטוהא מן יום מסחהם מן בני אסראיל רסם אלדהר לאג̇יאלהם
הד̇ה אלשריעה ללצעידה ואלהדיה ואלד̇כוה וקרבאן אלאת̇ם וללכמאל ולד̇בח אלסלאמה
אלתי אמר אללה בהא מוסי פי ג̇בל סיני פי יום אמר בני אסראיל אן יקרבו קראבינהם ללה פי בריה סיני