ת̇ם כלם אללה מוסי קאילא
מר הרון ובניה קאילא הד̇ה שריעה אלצעידה הי אלצעידה תוצ̇ע עלי וקיד אלמד̇בח טול אלליל אלי אלגדאה ונאר אלמד̇בח תסתוקד עליה
וילבס אלאמאם קמיצא מן עשר וסראויל עשר ילבס עלי בדנה וירפע אלרמאד אלד̇י תאכל אלנאר אלצעידה עלי אלמד̇בח ויצירה לזק אלמד̇בח
ת̇ם יסלך̇ ת̇יאבה וילבס ת̇יאבא אכ̇ר ויכ̇רג̇ אלרמאד אלי כ̇ארג̇ אלעסכר אלי מוצ̇ע טאהר
ואלנאר אלתי עלי אלמד̇בח תסתוקד פיה ולא תטפא וישעל עליהא אלאמאם חטבא פי כל גדאה וינצ̇ד עליהא אלצעידה ויקתר עליהא שחום אלסלאמה
כד̇אך אלנאר דאימא תוקד עלי אלמדבח ולא תטפא
והד̇ה שריעה אלהדיה אן יקדמהא בנו הרון בין ידי אללה בין ידי אלמד̇בח
וירפע מנהא בקבצ̇תה מן סמידהא ודהנהא וג̇מיע לבאנהא אלד̇י עליהא פיקתר פוחהא עלי אלמד̇בח מקבול מרצ̇י ללה
ואלפאצ̇ל מנהא יאכלה הרון ובנוה פטירא תוכל פי מוצ̇ע מקדס פי צחן כ̇בא אלמחצ̇ר יאכלוהא
לא תכ̇בז כ̇מירא ג̇עלתהא קסמהם מן קראבני מן כ̇ואץ אלאקדאס הי כאלד̇כוה וקרבאן אלאת̇ם
כל ד̇כר מן בני הרון יאכלהא רסם אלדהר לאג̇אלכם מן קראבין אללה כל מן לאמסהא תקדס
ת̇ם כלם אללה מוסי קאילא
הד̇א קרבאן הרון ובניה אלד̇י יקרבה ללה מן יום מסחה עשר אלויבה סמידא הדיה דאימא נצפהא באלגדאה ונצפהא באלעשי
עלי טאבק באלדהן תעמל סתותיה תאת בהא רפכ̇ה ת̇רדא תקרבהא מקבול מרצ̇י ללה
וכד̇לך אלאמאם אלמסתכ̇לף בעדה מן בניה יצנעהא רסם אלדהר ללה ג̇מלה תקתר
וסאיר הדאיא אלאמאם ג̇מלה תקתר ולא תוכל
וכלם אללה מוסי תכלימא
מר להרון ולבניה קאילא הד̇ה שריעה אלד̇כוה פי מוצ̇ע תד̇בח פיה אלצעידה תד̇בח אלד̇כוה בין ידי אללה אד̇ הי מן כ̇ואץ אלאקדאס
אלאמאם אלמד̇כי בהא יאכלהא פי מוצ̇ע מקדס תוכל פי צחן כ̇בא אלמחצ̇ר
כל מן דני בלחמהא תקדס ואן אנתצ̇ח מן דמהא אלד̇י ינצ̇ח מנהא עלי ת̇וב פיגסל פי מוצ̇ע מקדס
ואנא אלכ̇זף אלד̇י תטבך̇ פיה יכסר פאן טבכ̇ת פי אנא נחאס פלידלך ויגסל באלמא
כל ד̇כר מן אלאימה יאכלהא אד̇ הי מן כ̇ואץ אלאקדאס
וכל ד̇כוה ידכ̇ל מן דמהא אלי כ̇בא אלמחצ̇ר ליסתגפר בה פי אלקדס פלא תוכל בל תחרק באלנאר