ואי אנסאן אכ̇טא באן סמע צות חרג̇ והו שאהד או ראי ד̇לך או עלם בה ולם יכ̇בר פקד חמל וזרה
או אנסאן דני בשי מן אלאמור אלנג̇סה או בנבילה וחש נג̇ס או בנבילה בהימה נג̇סה או בנבילה שי מן אלדביב אלנג̇ס וגאב ד̇לך ענה פהו נג̇ס ואת̇ם
או דני בנג̇אסה אנסאן בשי מן נג̇אסתה ממא סבילה אן ינג̇ס בהא פגאב ענה פאת̇ם והוא עאלם במא פעל ואת̇ם
או אנסאן חלף בלפט̇ שפתיה לאסאה או לאחסאן עלי ג̇מיע מא לפט̇ אלאנסאן בימין וגאב ד̇לך ענה ת̇ם עלם במא פעל ואת̇ם בואחדה מן הד̇ה
פאד̇א את̇ם בואחדה מנהא ת̇ם אקר במא אכ̇טא
פליאת בקרבאנה ללה עלי כ̇טיתה אלד̇י אכ̇טא אנת̇י מן אלגנם נעג̇ה או שאה ללד̇כוה ויסתגפר ענה אלאמאם מן כ̇טיתה
פאן לם תנל ידה מקדאר שאה פליאת בקרבאנה עלי מא אכ̇טא שפנינין או פרכ̇י חמאם ללה אחדהמא ללד̇כוה ואלאכ̇ר ללצעידה
פאד̇א אתי בהמא אלי אלאמאם פליקרב אלד̇י ללד̇כוה אולא ויפצל ראסה ממא ילי קפאה ולא יפרז
וינצ̇ח מן דם אלד̇כוה עלי חאיט אלמד̇בח ואלפאצ̇ל מן אלדם ימצל עלי אסאס אלמד̇בח לאנהא ד̇כוה
ואלת̇אני יעמלה צעידה כאלסירה ויסתגפר ענה אלאמאם ען כ̇טיתה אלתי אכ̇טא ויגפר לה
ואן לם תנל ידה ת̇מן שפנינין או פרכ̇י חמאם פליאת בקרבאנה עלי מא אכ̇טא עשר אלויבה סמיד ללד̇כוה ולא יצב עליהא דהנא ולא יג̇על עליהא לבאנא לאנהא ד̇כוה
פאד̇א אתי בהא אלי אלאמאם וקבץ̇ אלאמאם מנהא מלו קבצ̇תה פוחהא פקתרה עלי אלמד̇בח מע קראבין אללה כד̇אך תציר ד̇כוה
ויסתגפר ענה אלאמאם ען כ̇טיתה אלתי אכ̇טא בואחדה מן הד̇ה ויגפר לה ותציר ללאמאם כסאיר אלהאדיא
ת̇ם כלם אללה מוסי תכלימא
אי אנסאן נכת̇ נכת̇א ואכ̇טא בסהו בשי מן אקדאס אללה פליאת בקרבאנה ללה כבשא צחיחא מן אלגנם בקימתה מת̇אקיל פצ̇ה במת̇קאל אלקדס ללקראבין
ואלד̇י אכ̇טא בה מן אלקדס יגרם מת̇לה וכ̇מסה יזד עליה ויעטה ללאמאם ואלאמאם יסתגפר עליה בכבש אלקרבאן פיגפר לה
ואי אנסאן אכ̇טא פעמל ואחדה מן פראיץ̇ אללה אלתי לא תעמל ולם יעלם באנה קד את̇ם וחמל וזרה
פליאת בכבש צחיח מן אלגנם בקימתה ללקרבאן אלי אלאמאם ויסתגפר ענה אלאמאם ען סהוה אלד̇י סהא והו לא יעלם פיגפר לה
הו קרבאן אלאת̇ם ען את̇מה אלד̇י את̇ם ללה
ת̇ם כלם אללה מוסי קאילא
אי אנסאן אכ̇טא ונכת̇ נכת̇א באללה פג̇חד צאחבה ודיעה או מעאמלה או גצב או גשם צאחבה
או וג̇ד צ̇אלה וג̇חדהא וחלף עלי באטל עלי כ̇לה מן ג̇מיע מא יעמל אלאנסאן פיכ̇טא בהא
פאד̇א הו אכ̇טא ואת̇ם פלירד אלגצב אלד̇י גצבה או אלגשם אלד̇י גשמה או אלודיעה אלתי אודעת ענדה או אלצ̇אלה אלתי וג̇דהא
או מא סוי ד̇לך ממא חלף עליה באטלא פלירדה בראסה ויזד עליה אכ̇מאסה ויעטה לאלד̇י הו לה פי יום אעתראפה בד̇נבה
וליאת בקרבאנה ללה כבשא צחיחא מן אלגנם בקימתה ללקרבאן אלי אלאמאם
ויסתגפר ענה אלאמאם בין ידי אללה ויגפר לה עלי איה כ̇לה מן ג̇מיע מא יעמל פיאת̇ם בהא