וקאל לה אללה אדכ̇ל אנת וג̇מיע אלך אלי אלתאבות פאני ראיתך צאלחא בין ידי פי הד̇א אלג̇יל
מן ג̇מיע אלבהאים אלטאהרה תאכ̇ד̇ סבעה סבעה ד̇כורא ואנאת̇א ומן אלבהאים אלתי ליסת בטאהרה זוג̇ין ד̇כורא ואנאת̇א
ואיצ̇א מן טאיר אלסמא סבעה סבעה ד̇כורא ואנאת̇א ליחיא נסלהם עלי ג̇מיע וג̇ה אלארץ̇
פאן בעד אלסבעה איאם אנא ממטר עלי אלארץ̇ ארבעין יומא וארבעין לילה ואמחו ג̇מיע אלנאס אלד̇ין צנעתהם ען וג̇ה אלארץ̇
ועמל נוח בג̇מיע מא אמרה אללה בה
וכאן נוח אבן סת מאיה סנה חין כאן מא אלטופאן עלי אלארץ̇
פדכ̇ל נוח ובנוה וזוג̇תה ונסא בניה מעה אלי אלתאבות מן קבל מא אלטופאן
מן אלבהאים אלטאהרה ומן אלבהאים אלתי ליסת בטאהרה ומן אלטאיר וסאיר אלדאב עלי אלארץ̇
אזואג̇א אזואג̇א דכ̇לו אלי נוח אלי אלתאבות ד̇כור ואנאת̇ כמא אמרה אללה בה
ולמא כאן בעד סבעה איאם כאן מא אלטופאן עלי אלארץ̇
פי סנה סת מאיה מן עמר נוח פי אלשהר אלת̇אני פי אליום אלסאבע עשר מנה פי ד̇לך אליום תשקקת עיון אלגמר אלעט̇ים ורואזן אלסמא תפתחת
ואקאם אלמטר עלי אלארץ̇ ארבעין יומא וארבעין לילה
פי ד̇את ד̇לך אליום דכ̇ל נוח ושם וחם ויפת בנוה וזוג̇תה ות̇לת̇ נסא בניה מעהם אלי אלתאבות
הם וג̇מיע אלוחוש לאצנאפהא וג̇מיע אלבהאים לאצנאפהא וסאיר אלדביב אלדאב עלי אלארץ̇ לאצנאפה וג̇מיע אלטאיר לאצנאפה כל טאיר די ג̇נאח
ודכ̇לו אלי נוח אלי אלתאבות אזואג̇א אזואג̇א מן כל בשר פיה רוח אלחיוה
ואלדאכ̇לון ד̇כור ואנאת̇ מן כל בשרי דכ̇לו כמא אמרה אללה בה וחג̇ב אללה דונה
ולמא אקאם אלטופאן ארבעין יומא עלי אלארץ̇ כת̇ר אלמא פחמל אלתאבות וארתפעת ען אלארץ̇
ולמא כת̇ר אלמא ועט̇ם ג̇דא עלי אלארץ̇ סארת אלתאבות עלי וג̇ה אלמא
ולמא עט̇ם אלמא ג̇דא ג̇דא עלי אלארץ̇ תגטי ג̇מיע אלג̇באל אלשאמכ̇ה אלתי תחת אלסמא
כ̇מסה עשר ד̇ראע מן אלעלו צעד אלמא עלי אלארץ̇ ותגטת אלג̇באל
ותופי כל בשרי דאב עלי אלארץ̇ מן טאיר אלי בהימה אלי וחש וסאיר אלדביב אלדאב עלי אלארץ̇ וכל אלנאס
כל מן נסמה חיוה פי אנפה מן כל מן פי אלג̇פאף מאתו
ומחא אלמא כל אלנאס אלד̇ין עלי וג̇ה אלארץ̇ מן אנסאן אלי בהימה אלי דביב אלי טאיר אלסמא ואמתחו מן אלארץ̇ ותבקא נוח פקט ומן מעה פי אלתאבות
ולמא עט̇ם אלמא עלי אלארץ̇ מאיה וכ̇מסין יומא