פלם יטק יוסף אן יתרפק לד̇לך מן כת̇רה אלוקוף בין ידיה פנאדא אכ̇רג̇ו כל רג̇ל מן בין ידי ולם יקף אנסאן מעה חין תערף יוסף באכ̇ותה
פרפע צותה בבכא חתי סמעוה אלמצריון וסמעה אל פרעון
ת̇ם קאל יוסף לאכ̇ותה אנא יוסף הל עאד אבי באק פלם יטיקו אן יג̇יבוה ממא דהשו בין ידיה
קאל להם תקדמו אלי פתקדמו פקאל אנא יוסף אכ̇וכם אלד̇י בעתמוני אלי מצר
ואלאן לא תגתמו ולא ישתד עליכם אד̇ בעתמוני האהנא פאן אללה בעת̇ני בין ידיכם ללמעישה
וד̇לך אן הד̇ה סנתא ג̇וע קד מצ̇תא פי אלבלד ובקי כ̇מס סנין ליס פיהא זרע ולא חצאד
פבעת̇ני אללה בין ידיכם ליציר לכם בקאא פי אלבלד ויחיי לכם פליטה עט̇ימה
פאלאן ליס אנתם בעת̇תמוני האהנא אלא אללה פצירני אסתאד̇א לפרעון וסידא לג̇מיע אלה וסלטאנא עלי ג̇מיע בלד מצר
אסרעו ואצעדו אלי אבי וקולו לה כד̇א קאל אבנך יוסף צירני אללה סידא לג̇מיע אלמצריין אנחדר אלי לא תקף
פקם פי בלד אלסדיר ותכון קריבא מני אנת ובנוך ובנו בניך וגנמך ובקרך וג̇מיע מא לך
ואמונך ת̇ם לאן קד בקי כ̇מס סני ג̇וע כילא תפתקר אנת ואלך וג̇מיע מא לך
והוד̇א עיונכם נאט̇רה ועינא אכ̇י בנימין אן פאי יכ̇אטבכם
פאכ̇ברו אבי בג̇מיע כראמתי במצר וג̇מיע מא ראיתמוה ואסרעו ואחדרוה אלי ההנא
ת̇ם אנכב עלי ענק בנימן אכ̇יה פבכא ובנימן איצ̇א בכא עלי ענקה
וקבל סאיר אכ̇ותה ובכא עליהם ובעד ד̇לך כלמוה
וארתפע אלצות אלי בית פרעון וקיל לה קד ג̇או אכ̇וה יוסף פחסן ד̇לך ענדה וענד ג̇מיע עבידה
ת̇ם קאל פרעון ליוסף קל לאכ̇ותך אצנעו כ̇לה וסקו דואבכם ואמצ̇ו ורדוהא אלי בלד כנעאן
ואחמלו אבאכם ואלכם וצירו אלי אעטיכם כ̇יר בלד מצר ותאכלו אג̇וד מא פיהא.
ואנת מאמור אן תקול להם אצנעו כ̇לה כ̇ד̇ו לכם מן בלד מצר עג̇לא לאטפאלכם ונסאיכם ואחמלו אבאכם ותעאלו
ועיונכם לא תשפקו עלי אניתכם אן כ̇יר ג̇מיע בלד מצר הו לכם
פצנעו כד̇אך בנו אסראיל ואעטאהם יוסף עג̇לא באמר פרעון וזאדא ללטריק
ואעטי לכל רג̇ל מנהם כ̇לעה ואעטי בנימין ת̇לאת̇ מאיה דרהם וכ̇מס כ̇לעאת
ובעת̇ לאביה בעשרה חמיר מחמלה מן כ̇יר מצר ובעשר אתאן מחמלה ברא וטעאמא וגד̇אא לאביה ללטריק
ת̇ם בעת̇ באכ̇ותה וקאל להם לא תרג̇זו פי אלטריק
וצעדו מן מצר וג̇או אלי בלד כנעאן אלי יעקוב אביהם
פאכ̇ברוה וקאלו עאד יוסף באק ואיצ̇א הו סלטאן עלי ג̇מיע בלד מצר פשכך קלבה ולם ית̇ק בהם
ת̇ם כלמוה בג̇מיע כלאם יוסף אלד̇י כלמהם וראי אלעג̇לאת אלתי בעת̇ בהא לתחמלה פעאשת רוח יעקוב אביהם
וקאל אסראיל חסבי אן עאד יוסף אבני באק אמצ̇י ואראה קבל אן אמות