ת̇ם אמר יוסף וכילה וקאל לה אמלא אועיה אלקום טעאמא כמא יטיקון חמלה וציר פצ̇ה כל רג̇ל פי ועאיה
וג̇אמי ג̇אם אלפצ̇ה ציר פי פם ועא אלאצגר מע פצ̇ה מירתה פצנע כמא קאל לה יוסף
פלמא אצ̇א אלצבח אטלק אלקום הם וחמירהם
פהם קד כ̇רג̇ו מן אלקריה ולם יבעדו אד̇ קאל יוסף לוכילה קם פאכלבהם פאד̇א לחקתהם קל להם לם כאפיתם שרא בדל כ̇יר
אליס הד̇א אלד̇י ישרב פיה מולאי והו אנמא אמתחנכם בה אסיתם פימא צנעתם
פלחקהם וכלמהם בד̇לך
פקאלו לה לא יקל סידי הד̇א אלכלאם עבידך מעאד̇ון מן אן יצנעו מת̇ל הד̇א אלאמר
הוד̇א פצ̇ה וג̇דנאהא פי פואה אועיתנא רדדנאהא עליך מן בלד כנעאן פכיף נסרק מן בית מולאך פצ̇ה או ד̇הבא
ומן מוג̇ד מעה מן עבידך פליקתל ונחן איצ̇א נכון לסידי עבידא
קאל אלאן כמא קלתם כד̇אך הו מן וג̇ד מעה כאן לי עבדא ואנתם תכונון אבריא
פאסרעו וחט כל רג̇ל ועאה עלי אלארץ̇ ופתח כל רג̇ל ועאה
פפתש בדא באלאכבר ואנתהי אלי אלאצגר פוג̇ד אלג̇אם פי ועא בנימן
פכ̇רקו ת̇יאבהם ושאל כל רג̇ל עלי חמארה ורג̇עו אלי אלקריה
פדכ̇ל יהודה ואכ̇ותה אלי בית יוסף ועאדה ת̇ם פוקעו בין ידיה עלי אלארץ̇
קאל יוסף מא הד̇א אלצנע אלד̇י צנעתם אמא עלמתם אנה ימתחן רג̇ל מת̇לי
קאל יהודה מא נקול לסידי ומא נתכלם ובמא נחתג̇ אללה אוקע עבידך בד̇נבהם הא נחן עביד לסידי נחן ומן וג̇ד אלג̇אם פי ידה
קאל אנא מעאד̇ מן אן אצנע הד̇א אלרג̇ל אלד̇י וג̇ד אלג̇אם פי ידה הו יכון לי עבדא ואנתם אצעדו בסלאם אלי אביכם
פתקדם אליה יהודה וקאל יא סידי יתכלם עבדך בחצ̇רה מולאי ולא ישתד גצ̇בך עלי עבדך פאנך מת̇ל פרעון
כאן סידנא סאל עבידה קאילא הל מוג̇וד לכם אב או אך̇
פקלנא לה מוג̇וד לנא אב שיך̇ ואבן שיכ̇וכ̇ה צגיר ואכ̇וה קד מאת פבקי הו וחדה לאמה ואבוה יחבה
פקלת לעבידך אחדרוה אלי אג̇על ענאיתי בה
פקלנא לסידנא לא יטיק אלגלאם אן יתרך אבאה פאן הו תרכה מאת
וקלת לעבידך אן לם יחדר אכ̇וכם אלאצגר מעכם פלא תעאודו אן תרו וג̇הי
פלמא צעדנא אלי עבדך אבינא אכ̇ברנאה בכלאם סידנא
ולמא קאל אבונא ארג̇עו אשתרו לנא קלילא מן אלטעאם
קלנא לא נטיק אן ננחדר אן כאן אכ̇ונא אלצגיר מענא אנחדרנא לאנא לא נטיק נרא וג̇ה אלרג̇ל ואכ̇ונא אלצגיר ליס הו מענא
פקאל עבדך אבונא לנא אנתם תעלמון אן את̇נין ולדת לי זוג̇תי
פכ̇רג̇ אחדהמא מן ענדי וקלת לעלה קד אפתרס ולם ארה אלי אלאן
פאן אכ̇ד̇תם הד̇א איצ̇א מן ענדי וואפתה אלמניה אנזלתם שיבתי בחסרה אלי אלת̇רא
ואלאן אן צרת אלי עבדך אבי ואלגלאם ליס הו מענא ונפסה מעקודה בנפסה
פכמא ירי אנה ליס מענא ימות ויכונו עבידך קד אנזלו שיבה עבדך אבינא בחסרה אלי אלת̇רא
ואעלם אן עבדך צ̇מן אלגלאם מן אביה קאילא אן לם את בה אליך פאכון כ̇טיא לך טול אלזמאן
ואלאן יג̇לס עבדך מכאן אלגלאם עבדא לסידי ויצעד אלגלאם מע אכ̇ותה
פאני אפכר כיף אצעד אלי אבי ואלגלאם ליס הו מעי כילא אשאהד אלבלא אלד̇י ינאלה