ת̇ם רפע יעקוב רג̇ליה ומצ̇י אלי בלד אהל אלשרק
פראי פאד̇א בביר פי אלצחרא ואד̇א בת̇לת̇ה קטוע מן אלגנם ראבצ̇ה עליהא לאן מנהא יסקון אלקטוע וצכ̇רה עט̇ימה עלי פיהא
וכאן אד̇א אג̇תמע ת̇ם רעא אלקטוע דחרג̇ו אלחג̇ר ען פם אלביר וסקו אלגנם ת̇ם רדוה אלי מוצ̇עה
פקאל להם יעקוב יא אכ̇ותי מן אין אנתם פקאלו נחן מן חרן
קאל להם אתערפון לבן בן נחור קאלו נעם
קאל אסאלם הו קאלו נעם והוד̇א רחל בנתה ג̇איה מע אלגנם
ת̇ם קאל להם הוד̇א אלנהאר עאדה כביר וליס הו וקת אנצ̇מאם אלמאשיה אסקו אלגנם ואמצ̇ו ארעוהא
קאלו לא נטיק ד̇לך אלי אן יג̇תמע רעא אלקטוע ודחרג̇ו אלחג̇ר ען פם אלביר ונסקי אלגנם
בינאה יכ̇אטבהם אד̇ ג̇את רחל מע גנם אביהא לאנהא ראעיה
פכמא ראי יעקוב רחל בנת לבן כ̇אלה וגנם לבן כ̇אלה תקדם פדחרג̇ אלחג̇ר ען פם אלביר וסקי גנמה
ת̇ם קבל יעקוב רחל ורפע צותה ובכי
ואכ̇ברהא אנה אבן עמתהא אבן רבקה פחאצ̇רת ואכ̇ברת אבאהא
פלמא סמע לבן כ̇בר יעקוב בן אכ̇תה חאצ̇ר תלקאה פעאנקה וקבלה ואדכ̇לה אלי מנזלה פקץ עלי לבן ג̇מיע הד̇ה אלאמור
קאל לה לבן אנת עט̇מי ולחמי פאקאם ענדה שהרא
ת̇ם קאל לבן ליעקוב ואן אנת קריבי פתכ̇דמני מג̇נא אכ̇ברני מא הי אג̇רתך
וכאן ללבן אבנתאן אסם אלכברי לאה ואסם אלצגרי רחל
ועינא לאה חסנתאן וכאנת רחל חסנה אלחליה ואלמנט̇ר
פאחב יעקוב רחל וקאל אכ̇דמך סבע סנין ברחל אבנתך אלצגרי
קאל לבן אצלח אן אעטיהא לך מן אן אעטיהא לרג̇ל אכ̇ר קם ענדי
פכ̇דמה יעקוב ברחל סבע סנין וכאנת ענדה כאיאם יסירה מן מחבתה להא
ת̇ם קאל לה אעטני זוג̇תי אד̇ קד כמלת איאמי אדכ̇ל אליהא
פאג̇מע לבן ג̇מיע אהל אלמוצ̇ע וצנע להם מג̇לסא
פלמא כאן באלעשי אכ̇ד̇ לאה אבנתה פזפהא אליה ודכ̇ל אליהא
ואעטאהא לבן זלפה אמתה לתכון להא אמה
פלמא כאן באלגדאה פאד̇א בהא לאה פקאל ללבן מה ד̇א צנעת בי אליס ברחל כ̇דמתך ולם וארבתני
קאל לא יצנע כד̇א פי בלדנא אן תזוג̇ אלצגרי קבל אלכברי
לכן אכמל אסבוע הד̇ה אעטיך הד̇ה איצ̇א בכ̇דמה ת̇כ̇דמני סבע סנין אכ̇ר
פצנע יעקוב כד̇אך ואכמל אסבוע לאה ת̇ם אעטאה רחל אבנתה זוג̇ה
ואעטאהא לבן בלהה אמתה לתכון להא אמה
פלמא דכ̇ל אלי רחל אחבהא אכת̇ר מן לאה ת̇ם כ̇דמה סבע סנין אכ̇ר
ועלם אללה אן לאה משניה פרזקהא ולדא ורחל עאקר
פחמלת לאה וולדת אבנא ואסמתה ראובן לאנהא קאלת קד נט̇ר אללה לצ̇עפי ואלאן יחבני רג̇לי
וחמלת איצ̇א וולדת אבנא וקאלת קד סמע אללה אני משניה ורזקני איצ̇א הד̇א ואסמתה שמעון
וחמלת וולדת אבנא וקאלת הד̇ה אלמרה ינעטף אלי רג̇לי לאני קד ולדת לה ת̇לת̇ה אולאד ועלי ד̇לך סמי אסמה לוי
וחמלת איצ̇א וולדת אבנא וקאלת הד̇ה אלמרה אשכר אללה ולד̇לך אסמתה יהודה ת̇ם וקפת ען אלולאדה