ולמא שאך̇ אברהים וטען פי אלסן ובארכה אללה פי כל שי
קאל אברהים לעבדה שיך̇ מנזלה אלמסלט עלי ג̇מיע מא לה אום אלאן בידך אלי עהדי
ואחלפך באללה רב אלסמאואת ואלארץ̇ אלא תאכ̇ד̇ זוג̇ה לאבני מן בנאת אלכנעאניין אלד̇ין אנא מקים פי מא בינהם
אלא אלי בלדי ומולדי תמצ̇י ותאכ̇ד̇ זוג̇ה לאבני אסחק
פקאל לה אלעבד לעל לא תשא אלאמראה אן תתבעני אלי הד̇א אלבלד הל ארד אבנך אלי אלבלד אלד̇י כ̇רג̇ת מנה
קאל לה אברהים אחד̇ר אן תרד אבני אלי ת̇ם
אללה רב אלסמא אלד̇י אכ̇רג̇ני מן בית אבי ומן ארץ̇ מולדי אלד̇י קאל לי ואקסם לי קאילא לנסלך אעטי הד̇א אלבלד הו יבעת̇ במלאכה בין ידיך פתאכ̇ד̇ זוג̇ה לאבני מן ת̇ם
ואן לם תואפק אלאמראה אלמג̇י כ̇לפך פתברו מן ד̇לך אלימין עדא אנך לא תרג̇ע אבני ת̇ם
פאומי אלעבד בידה אלי עהד אברהים מולאה וחלף לה עלי הד̇א אלאמר
ת̇ם אכ̇ד̇ אלעבד עשרה ג̇מאל מן ג̇מאל מולאה ומצ̇א וכל כ̇יר מולאה מעה וקאם ומצ̇א אלי ארם נהרים אלי קריה נחור
פאנאך̇ אלג̇מאל כ̇ארג̇ אלקריה עלי ביר אלמא וקת אלעשא וקת כ̇רוג̇ אלנסא יסתקין
פקאל אללהם יא אלאה מולאי אברהים ופק בין ידי אליום חאג̇תי ואחסן בד̇לך אלי מולאי אברהים
האנא ואקף עלי עין אלמא ובנאת אהל אלקריה יכ̇רג̇ן ליסתקין מאא
פאיה ג̇אריה אקול להא מילי ג̇רתך חתי אשרב פתקול אשרב ואיצ̇א ג̇מאלך אסקי פקד ופקתהא לעבדך לאסחק ובהא אעלם אנך קד אחסנת אלי מולאי
פהו קבל אן יפרג מן כלאמה פאד̇א ברבקה קד כ̇רג̇ת אלתי ולדת לבתואל בן מלכה זוג̇ה נחור אכ̇י אברהים וג̇רתהא עלי כתפהא
ואלג̇אריה חסנה אלמנט̇ר ג̇דא בכר ורג̇ל לם יערפהא פנזלת אלי אלעין ומלאת ג̇רתהא וצעדת
פחאצ̇ר אלעבד תלקאהא וקאל אג̇רעיני אלאן קלילא מן ג̇רתך
קאלת אשרב יא סידי ואסרעת ואנזלת ג̇רתהא עלי ידהא ואסקתה
ולמא פרגת מן סקיה קאלת איצ̇א לג̇מאלך אסתקי אלי אן יכמל שרבהם
פאסרעת ופרגת ג̇רתהא פי אלסאקיה וחאצ̇רת איצ̇א אלי אלביר לתסתקי חתי אסתקת לכל ג̇מאלה
ואלרג̇ל מסתסק להא ממסך ליעלם הל אנג̇ח אללה טריקה אם לא
פלמא פרג אלג̇מאל מן שרבהם אכ̇ד̇ אלרג̇ל שנף ד̇הב וזנה נצף מת̇קאל פאעטאהא וג̇על סוארין עלי ידיהא וזנהמא עשרה מת̇אקיל ד̇הב
בעד מא קאל להא אכ̇בריני אבנה מן אנת הל אג̇ד פי בית אביך מוצ̇עא לנא נבית פיה
פקאלת לה אנא אבנה בתואל בן מלכה אלד̇י ולדתה לנחור
ת̇ם קאלת אלתבן ואלקת כת̇יר ענדנא ואיצ̇א מוצ̇ע ללמבית
ת̇ם כ̇ר אלרג̇ל וסג̇ד ללה
וקאל תבארך אללה אלאה מולאי אברהים אלד̇י לם יכ̇ל פצ̇לה ואחסאנה מן מולאי אנא פי טריק מסתקים סירני אללה אלי בית אכ̇י מולאי
ת̇ם חאצ̇רת אלג̇אריה ואכ̇ברת פי מנזל אמהא בהד̇ה אלאמור
ולרבקה אך̇ אסמה לבן פחאצ̇ר אלי אלרג̇ל אלי ברא אלי אלעין
ולמא ראי אלשנף ואלסוארין פי ידי אכ̇תה וסמע כלאמהא קאילה כד̇א קאל לי אלרג̇ל צאר אליה פאד̇א הו ואקף עלי אלג̇מאל עלי אלעין
פקאל אדכ̇ל יא מבארך אללה לם תקף ברא ואנא קד נג̇לת אלבית ואצלחת מוצ̇עא ללג̇מאל
פדכ̇ל אלרג̇ל אלמנזל וחל ען אלג̇מאל וטרח להא תבנא וקתא ואעטאה מאא ליגסל רג̇ליה וארג̇ל אלקום אלד̇ין מעה
ת̇ם ציר בין ידיה ליאכל פקאל לא אכל חתי אקול כלאמי קאל תכלם
קאל אנא עבד אברהים
ואללה בארך למולאי ג̇דא פעט̇ם ואעטאה גנמא ובקרא ופצ̇ה וד̇הבא ועבידא ואמא וג̇מאלא וחמירא
ת̇ם ולדת סארה זוג̇ה מולאי אבנא לה בעד שיכ̇וכ̇תהא פאעטאה ג̇מיע מא לה
פחלפני מולאי קאילא לא תאכ̇ד̇ זוג̇ה לאבני מן בנאת אלכנעאניין אלד̇ין אנא סאכן פי בלדהם
אלא אלי בית אבי תמצ̇י ואלי עשירתי ותאכ̇ד̇ זוג̇ה לאבני
פקלת למולאי פלעל לא תתבעני אלאמראה
פקאל לי אללה אלד̇י סלכת פי טאעתה יבעת̇ במלאכה בין ידיך וינג̇ח טריקך חתי תאכ̇ד̇ זוג̇ה לאבני מן עשירתי ומן בית אבי
חיניד̇ תברו מן חרג̇י אד̇א צרת אלי עשירתי ואן הם לא יעטוך כנת בריא מן חרג̇י
פג̇ית אליום אלי אלעין פקלת יא אללה אלאה מולאי אברהים אן כנת תנג̇ח טריקי אלד̇י אנא סאיר פיה
פהוד̇א אנא ואקף עלי עין אלמא פאיה ג̇אריה אלתי תכ̇רג̇ לתסתקי פאקול להא אסקיני קליל מא מן ג̇רתך
פתקול לי אשרב אנת ואיצ̇א לג̇מאלך אסתקי הי אלאמראה אלתי ופקהא אללה לאבן מולאי
אנא קבל אן אפרג מן אלכלאם פי נפסי פאד̇א ברבקה כ̇ארג̇ה וג̇רתהא עלי כתפהא פנזלת אלי אלעין ואסתקת פקלת להא אסקיני אלאן
פאסרעת ואנזלת ג̇רתהא ענהא וקאלת אשרב ואיצ̇א ג̇מאלך אסקי פשרבת וסקת אלג̇מאל.
ת̇ם סאלתהא וקלת להא בנת מאן אנת קאלת בנת בתואל בן נחור אלד̇י ולדתה לה מלכה פצירת אלשנף עלי אנפהא ואלסוארין עלי ידיהא
וכ̇ררת וסג̇דת ללה ובארכת אללה אלאה מולאי אברהים אלד̇י סירני פי טריק אלחק לאכ̇ד̇ אבנה אכ̇י מולאי לאבנה
ואלאן אן כנתם צאנעין פצ̇לא ואחסאנא מע מולאי אכ̇ברוני ואלא פאכ̇ברוני חתי אולי ימנה או יסרה
פאג̇אבה לבן ובתואל וקאלא מן ענד אללה כ̇רג̇ הד̇א אלאמר מא נטיק נכלמך פיה בשר ולא בכ̇יר
הוד̇א רבקה בין ידיך כ̇ד̇הא ואמץ̇ תכן זוג̇ה לאבן מולאך כמא ופק אללה
פלמא סמע עבד אברהים כלאמהם סג̇ד עלי אלארץ̇ ללה
ואכ̇רג̇ אלעבד אניה פצ̇ה ואניה ד̇הב ות̇יאבא פאעטא רבקה ופואכה אעטא אכ̇אהא ואמהא
ואכלו ושרבו הו ואלקום אלד̇ין מעה ובאתו פלמא קאמו באלגדאה קאל אטלקוני אלי מולאי
וקאל אכ̇והא ואמהא תקים אלג̇אריה ענדנא חולא או עשרה ובעד̇ ד̇לך תמצ̇י
קאל להם לא תוכ̇רוני ואללה קד אנג̇ח טריקי אטלקוני אמץ̇ אלי מולאי
קאלו נדעו באלג̇אריה ונסאלהא ען קולהא
פדעו ברבקה וקאלו להא אתמצ̇ין מע הד̇א אלרג̇ל קאלת נעם
פאטלקו רבקה אכ̇תהם ודאיתהא ועבד אברהים ורג̇אלה
ובארכו לרבקה וקאלו להא יא אכ̇תנא יכן מנך אלוף ורבואת ויחוזו בנוך קרי שאניהם
פקאמת רבקה וג̇ואריהא פרכבן אלג̇מאל ומצ̇ין מע אלרג̇ל פאכ̇ד̇ אלעבד רבקה ומצ̇י
וכאן אסחק קד ג̇א פי מג̇יה מן אלביר אלתי ללחי אלנאט̇ר והו מקים פי בלד אלקבלה
פכ̇רג̇ אסחק ליצלי פי אלצחרא ענד תולי אלליל פרפע עיניה פנט̇ר פאד̇א באלג̇מאל מקבלה
ולמא רפעת רבקה עיניהא וראת אסחק כאדת תסקט ען אלג̇מל
וקאלת ללעבד מן הד̇א אלרג̇ל אלסאיר פי אלצחרא תלקאנא קאל אלעבד הו מולאי פאכ̇ד̇ת אלקנאע ותגטת בה
ת̇ם קץ אלעבד עלי אסחק בג̇מיע אלאמור אלתי צנעהא
פאדכ̇להא אסחק אלי כ̇בא סארה אמה ואכ̇ד̇ רבקה וצארת לה זוג̇ה ואחבהא ותעזא אסחק בעד מות אמה