ת̇ם ד̇כר אללה סארה כמא קאל וצנע אללה לסארה כמא ועד
פחמלת וולדת סארה לאברהים אבנא פי שיכ̇וכ̇תה פי אלוקת אלד̇י קאל לה אללה
פסמא אברהים אבנה אלמולוד לה אלד̇י ולדתה לה סארה אסחק
וכ̇תן אברהים אבנה אבן ת̇מניה איאם כמא אמרה אללה
וכאן אברהים אבן מאיה סנה חין ולד לה אסחק אבנה
וקאלת סארה קד צנע אללה לי סרורא כל מן סמע פרח לי
ת̇ם קאלת מן קאל לאברהים אן סארה תרצ̇ע אבנא אד̇ ולדת אבנא פי שיכ̇וכ̇תה
ת̇ם כבר אלצבי ופטם פצנע אברהים מג̇לסא עט̇ימא פי יום פטם אסחק
ת̇ם ראת סארה אבן הג̇ר אלמצריה אלד̇י ולדתה לאברהים לאעבא
פקאלת לה אטרד הד̇ה אלאמה ואבנהא פאנה לא ירת̇ מע אבני אסחק
פשק אלאמר ג̇דא עלי אברהים בסבב אבנה
וקאל לה אללה לא ישק עליך אמר אלצבי ואמר אמתך כל מא תקולה לך סארה אקבל מנהא פאן מן אסחק ידעי לך אלנסל
ואבן אלאמה איצ̇א אציר מנה אמה פאנה נסלך
ואדלג̇ אברהים באלגדאה ואכ̇ד̇ טעאמא וקרבה מא פדפעהמא אלי הג̇ר וציר עלי ענקהא ואעטאהא אלצבי ואטלקהא ומצ̇ת פצ̇לת פי בריה ביר סבע
ופני אלמא מן אלקרבה פטרחת אלצבי תחת בעץ̇ אלשג̇ר
ומצ̇ת פג̇לסת חד̇אה בעידא כגלוה קוס לאנהא קאלת לא ארא מותה פג̇לסת חד̇אה ורפעת צותהא ובכת
פסמע אללה צות אלצבי ונאדא מלאך בהג̇ר מן אלסמא וקאל להא מא לך יא הג̇ר לא תכ̇אפי אן אללה קד סמע צות אלצבי חית̇ הו ת̇ם
קומי פאחמליה ואמסכי ידך עליה פאני אציר מנה אמה כבירה
פכשף אללה ען בצרהא וראת ביר מא ומצ̇ת ומלאת אלקרבה מאא ואסקת אלצבי
וכאן אללה מעה חתי כבר פאקאם פי אלבריה וכאן ראמי קוס
ואקאם פי בריה פארן ואתכ̇ד̇ת לה אמה זוג̇ה מן בלד מצר
פלמא כאן פי ד̇לך אלוקת קאל אבימלך ופיכל רייס ג̇ישה לאברהים קאילא אללה מעך פי ג̇מיע מא תצנעה
ואלאן אחלף לי באללה ההנא אנך לא תגדר בי ובנסלי ובעקבי כאלאחסאן אלד̇י צנעתה מעך תצנעה מעי ומע אלבלד אלד̇י סכנתה
וקאל אברהים אנא אחלף
וובך̇ אברהים אבימלך בסבב ביר אלמא אלתי גצבוהא עבידה
וקאל אבימלך לם אעלם מן צנע הד̇א אלאמר ואנת לם תכ̇ברני ואנא איצ̇א לם אסמע אלא אליום
ת̇ם אכ̇ד̇ אברהים גנמא ובקרא ואעטי אבימלך ועהדא ג̇מיעא עהדא
פאוקף אברהים סבע נעאג̇ מן אלגנם וחדהן
וקאל אבימלך לאברהים מא הד̇ה אלסבע נעאג̇ אלתי אוקפת וחדהן
וקאל אן תאכ̇ד̇הא מן ידי לקבל אן תכון לי שאהדה אני חפרת הד̇ה אלביר
ולד̇לך סמי אלמוצ̇ע ביר סבע לאנהמא ת̇ם חלפא ג̇מיעא
פלמא קטעו עהדא פי ביר סבע קאם אבימלך ופיכל ריס ג̇ישה ורג̇עו אלי בלד אלפלסטין
וגרס גרסא פי ביר סבע ודעי ת̇ם באסם אללה רב אלעאלם
וסכן אברהים פי בלד פלסטין איאמא כת̇ירה