פלמא צאר אברם אבן תסע ותסעין סנה תג̇לא לה אללה וקאל לה אנא אלטאיק אלכאפי אסלך פי טאעתי וכן צחיחא
ואג̇על עהדי ביני ובינך ואכת̇רך ג̇דא ג̇דא
פוקע אברם עלי וג̇הה וכ̇אטבה אללה קאילא
האנא ג̇אעל עהדי מעך ותכון אבא ג̇מהור אלאמם
ולא יסמי איצ̇א אסמך אברם בל יכון אסמך אברהם לאני ג̇עלתך אבא ג̇מהור אלאמם
ואנמיך ג̇דא ג̇דא ואג̇על מנך אממא ומלוך מנך יכ̇רג̇ון
ואת̇בת עהדי ביני ובינך ונסלך בעדך לאג̇יאלהם עהד אלדהר לאכון לך אלאהא ולנסלך בעדך
ואעטיך ונסלך בעדך בלד סכנאך ג̇מיע בלד כנען חוז אלדהר ואכון להם אלאהא
ת̇ם קאל אללה לאברהם ואנת פאחפט̇ עהדי אנת ונסלך בעדך לאג̇אלהם
הד̇א עהדי אלד̇י תחפט̇וה ביני ובינכם ונסלך בעדך יכ̇תתן מנכם כל רג̇ל
פאד̇א תכ̇תנון קלפה אחלילכם תכון עלאמה עהדי ביני ובינכם
ואבן ת̇מניה איאם יכ̇תתן כל ד̇כר מנכם לאג̇אלכם אלמולוד פי מנאזלכם ואלמשתרי בת̇מן מן כל גריב אלד̇י ליס הו מן נסלך
בל תכ̇תן אלמולוד פי ביתך ואלמשתרי לך בת̇מן ויכון עהדי פי אבדאנכם עהד אלדהר
ואי רג̇ל אקלף לא יכ̇תן אלקלפה מן בדנה ינקטע ד̇לך אלרג̇ל מן קומה למא פסך̇ עהדי
ת̇ם קאל אללה לאברהים שרי זוג̇תך לא תסמהא שרי בל סמהא שרה
פאני אבארך פיהא וארזקך מנהא אבנא ואבארך פיהא ויכון מנהא אמה ומלוך אלשעוב מנהא יכ̇רג̇ון
פוקע אברהים עלי וג̇הה וצ̇חך וקאל פי נפסה אלאבן מאיה סנה יולד וסארה בנת תסעין סנה תלד
פקאל אברהים בין ידי אללה לית יסמעיל יחיא בין ידיך
קאל אללה לה לכן סארה זוג̇תך סתלד לך אבנא ותסמיה אסחק ואת̇בת עהדי מעה עהד אלדהר ולנסלה בעדה
ופי אסמאעיל קד סמעתך הא אנא קד בארכתה לאת̇מרה ואכת̇רה ג̇דא ג̇דא ואת̇ני עשר שריפא יולד ואג̇על מנה אמה עט̇ימה
ועהדי את̇בתה מע אסחק אלד̇י תלד לך סארה פי מת̇ל הד̇א אלוקת פי אלסנה אלאכ̇רי
פלמא פרג מן מכ̇אטבתה ארתפע נור אללה ען אברהם
פאכ̇ד̇ אברהים אסמאעיל אבנה וג̇מיע אלמולודין פי מנזלה ואלמשתרין בת̇מנה כל רג̇ל מן אהל בית אברהים פכ̇תן אלקלפה מן אבדאנהם פי ד̇את ד̇לך אליום כמא אמרה אללה
וכאן אברהים אבן תסע ותסעין סנה חין כ̇תן אלקלפה מן בדנה
ואסמאעיל אבנה אבן ת̇לאת̇ עשר סנה חין כ̇תן אלקלפה מן בדנה
פי ד̇את ד̇לך אליום אכ̇תתן אברהים ואסמעיל אבנה
וכל רג̇ל פי מנזלה אלמולוד פיה ואלמשתרי בת̇מנה כל גריב אכ̇תתנו מעה