פצעד אברם מן מצר הו וזוג̇תה וג̇מיע מא לה ולוט מעה אלי אלקבלה
ואברם עט̇ים ג̇דא באלמאשיה ואלפצ̇ה ואלד̇הב
ומצ̇א פי מראחלה מן אלקבלה אלי בית אל אלי אלמוצ̇ע אלד̇י כאן ת̇ם כ̇באה פי אלאבתדא בין בית אל ובין אלעי
אלי מוצ̇ע אלמד̇בח אלד̇י צנעה ת̇ם פי אלאבתדא פדעא ת̇ם אברם באסם אללה
ואיצ̇א ללוט אלסאלך מע אברם כאן גנם ובקר ואכ̇ביה
ולם יחמלהמא אלבלד אן יקימא פיה ג̇מיעא אד̇ כאן סרחהמא כת̇ירא ולם יטיקא אן יקימא ג̇מיעא
פכאנת כ̇צומה בין רעאה מאשיה אברם ובין רעא מאשיה לוט ואלכנעאניון ואלפריזיון חיניד̇ מקימון פי אלבלד
חתי קאל אברם ללוט לא תכן כ̇צומה ביני ובינך ובין רעאי ורעאך פאננא קום ד̇ו קראבה
אליס ג̇מיע אלארץ̇ בין ידיך אנפרד מני אמא יסרה פאתיאמן ואמא ימנה פאתיאסר
פרפע לוט עיניה וראי ג̇מיע מרג̇ אלארדן אן כלה סקי קבל אן יהלך אללה סדום ועמורה כג̇נאן אללה כארץ̇ מצר אלי אן תג̇י אלי זגר
פאכ̇תאר לה לוט ג̇מיע מרג̇ אלארדן ורחל מן אלמשרק ואנפרד כל אמר ען אכ̇יה
אברם אקאם פי בלד אלכנעאן ולוט אקאם פי קרי אלמרג̇ וכ̇ים אלי סדום
ואהל סדום אשראר וכ̇אטיון ללה ג̇דא
ת̇ם קאל אללה לאברם בעד מא פארקה לוט ארפע עיניך ואנט̇ר מן אלמוצ̇ע אלד̇י אנת ת̇ם שמאלא וג̇נובא ושרקא וגרבא
פאן ג̇מיע אלארץ̇ אלד̇י תראהא לך אעטיהא ולנסלך אלי אלדהר
ואציר נסלך כתראב אלארץ̇ חתי אן אמכן אלאנסאן אן יחצי תראב אלארץ̇ פנסלך איצ̇א יחצא
קם פאמש פי אלארץ̇ טולהא וערצ̇הא פאני לך אעטיהא
פכ̇ים אברם וג̇א פאקאם פי מרג̇ ממרא אלד̇י פי חברא ובנא ת̇ם מד̇בחא ללה