ואן וג̇ד אלסארק פי אלנקב פצ̇רב ומאת פליס לה דיה
ואן אשרקת אלשמס עליה פלה דיה פליגרם מא סרק ואן לם יכן מעה פליבע עלי סרקה
ואן וג̇דת פי ידה אלסרקה מן ת̇ור אלי חמאר אלי שאה אחיא פליגרם בדל אלואחד את̇נין
אד̇א ארעי אלאנסאן צ̇יעה או כרמא לה פאטלק בהימתה או רעת פי צ̇יעה אכ̇רי אג̇וד צ̇יעתה או כרמה יגרם
ואן כ̇רג̇ת נאר פוג̇דת שוכא ואחרקת כדיסא או סנבלא קאימא או סאיר מא פי אלצ̇יאע פליגרם מא יג̇ב פיה אלמשעאל אלאשתעאל
ואן דפע אנסאן אלי צאחבה ורקא או אניה ליחפט̇ה לה פסרק ד̇לך מן בית אלרג̇ל פאן וג̇ד אלסארק פליגרם את̇נין
ואן לם יוג̇ד אלסארק תקדם צאחב אלמנזלה אלי אלחאכם וחלף אנה לם ימד ידה אלי מלך צאחבה
ועלי כל אמר יג̇חדה מן ת̇ור אלי חמאר ואלי שאה ואלי ת̇וב ואלי כל צ̇אלה אן יקול הד̇א הו לי פאלי אלחאכם ירפע אמרהמא פמן ט̇למה אלחאכם יגרם את̇נין לצאחבה
ואן דפע אנסאן אלי צאחבה חמארא או ת̇ורא או שאה או סאיר אלבהאים ליחפט̇ה פמאת או אנכסר או סבי בגיר בינה
פימין אללה תפצל פי מא בינהמא אנה לם ימד ידה אלי מלך צאחבה פיקבלהא צאחבה ולא יגרם
ואן סרק מן ענדה יגרם לצאחבה
פאן אפתרס פליאת בשאהד ולא יגרם אלפריסה
ואד̇א אסתעאר אלאנסאן שיא מן צאחבה פאנכסר או מאת וליס צאחבה מעה פליגרמה
ואן כאן צאחבה מעה פלא יגרמה ואן כאן אג̇ירא פקד מצ̇י באג̇רתה
ואן כ̇דע רג̇ל ג̇אריה בכרא לם תמלך פצ̇אג̇עהא פלימהרהא לה זוג̇ה
פאן אבא אבוהא אן יזוג̇הא מנה פליזן לה מן אלורק כמהר אלאבכאר
ואלסאחר פלא תסתבקה
פכל מן צ̇אג̇ע שיא מן אלבהאים פליקתל קתלא
ומן ד̇בח ללמעבודאת פליתלף חאשא ללה וחדה
ואלגריב לא תגבנה ולא תצ̇גטה פטאלמא כנתם גרבא פי ארץ̇ מצר
וכל ארמלה ויתים פלא תט̇למה
פאן כאן ט̇למתה וצרך̇ אלי אג̇בתה ען צראכ̇ה
באן ישתד גצ̇בי ואקתלכם באלסיף פתציר נסאכם אראמל ובנכם יתאמא
ואן אקרצ̇ת בעץ̇ קומי ורקא לצ̇עיף מעך פלא תכן לה כאלגרים ולא תצירו עליה עינה
אן אסתרהנת ת̇וב צאחבך פענד מגיב אלשמס רדה אליה
אן כאנת הי כסותה וחדהא או הי ת̇וב בדנה פכיף ד̇א ינצ̇ג̇ע פאן הו צרך̇ אלי סמעת לה אני ראוף
אלחאכם לא תשתם ושריף פי קומך לא תלענה
וסלאפך ורשחך לא תוכ̇רהמא ובכור בניך תעטי לי
וכד̇אך תצנע בבקרך וגנמך סבעה איאם יכון מע אמה ופי אליום אלת̇אמן תעטיה לי
ואנאסא מקדסין תכונו לי וחיואן מפתרס פי אלצחרא לא תאכלוה בל ללכלב אטרחוה