אד̇א אדכ̇לך אללה רבך אלי אלבלד אלד̇י אנת דאכ̇ל אליה לתחוזה פיטחטח אממא כת̇ירה מן בין ידיך אלחתיין ואלגרגשיין ואלאמוריין ואלכנעאניין ואלפרזיין ואלחויין ואליבוסיין סבעה אמם אכת̇ר ואעט̇ם מנך
פסלמהם אללה רבך בין ידיך פאקתלהם ואתלפהם ולא תעאהד מעהם עהדא ולא תרף עליהם
ולא תצאהרהם פתעטי אבנתך לאבנה ולא תאכ̇ד̇ אבנתה לאבנך
פאנהם יזילון אבנך מן עבאדתי פיעבדון אלהא אכ̇ר פישתד גציב אללה עליך וינפדיך סריעא
בל כד̇א פאצנעו בהם מד̇אבחהם פאנקצ̇ו ודכאכהם פכסרו וסואריהם תג̇דעו ופסולהם פאחרקוהא באלנאר
לאנך שעב מקדס ללה רבך ובך אכ̇תאר אללה אן תכון לה אמה כאצה מן ג̇מיע אלאמם אלתי עלי וג̇ה אלארץ̇
וליס מן כת̇רתכם מן ג̇מיע אלאמם אצטפאכם אללה ואכ̇תארכם בל אנתם אקל מנהם מג̇מועין
לכן מן מחבה אללה לכם ומן חפט̇ה אלימין אלתי קסם בהא לאבאיכם אכ̇רג̇כם אללה ביד שדידה ופדאך מן בית אלעבודיה מן יד פרעון מלך מצר
פאעלם אן אללה רבך הו אללה אלטאיק אלאמין חאפט̇ אלעהד ואלאחסאן למחביה וחאפט̇י וצאיאה לאלף ג̇יל
ומכאפי שאניה בחצ̇רתה לאנפאד̇ה ולא יוכ̇ר לה שיא בל בחצ̇רתה יכאפיה
ואחפט̇ אלוצאיא ואלרסום ואלאחכאם אלתי אמרך בהא אליום ואעמל בהא
פיכון ג̇זא מא תסמעון הד̇ה אלאחכאם ותחפט̇והא ותעמלו בהא אן יחפט̇ אללה רבך לך אלעהד ואלפצ̇ל אללד̇ין קסם בהמא לאבאיך
פיחבבך ויבארך פיך ויכת̇רך ויבארך פי ת̇מרך ות̇מר ארצ̇ך ברך ועצירך ודהנך ונתאג̇ בקרך וג̇פראת גנמך פי אלבלד אלד̇י קסם אללה לאבאיכם אן יעטיכה
ותכון מבארכא מן ג̇מיע אלאמם ולא יבקא פיך עאקר ולא עאקרה ולא פי בהאימך
ויזיל אללה מנך כל מרץ̇ וג̇מיע אדוא מצר אלרדיה אלתי תערפהא לא יחל בך שיא מנהא בל יחלהא בשאניך
פתפני ג̇מיע אלשעוב אלתי יעטיכהם אללה רבך ולא תשפק עינך עליהם ולא תעבד מעבודתהם פיכונו לך והקא
פאן קלת פי נפסך הד̇ה אלאמם אכת̇ר מני פכיף אטיק אן אקרצ̇הם
לא תכ̇פהם בל אד̇כר מא צנע אללה רבך בפרעון וסאיר אלמצריין
אלאעלאם אלעט̇ימה אלתי ראתהא עינאך ואלאיאת ואלבראהין ואליד אלשדידה ואלד̇ראע אלממדודה כמא אכ̇רג̇ך אללה רבך כד̇אך יצנע בג̇מיע אלאמם אלתי תכ̇אפהם
ויבעת̇ באלעאהה פיהם חתי יביד אלבאקיון ואלמנסתרון מן בין ידיך
פלא תרהבהם לאן נור אללה רבך פי מא בינך אלטאיק אלעט̇ים אלמכ̇יף
והו יטחטח אולאיך אלאמם מן בין ידיך קלילא קלילא אד̇ לא יג̇וז אן תפניהם סריעא כילא יכת̇ר עליך וחש אלצחרא
פאד̇א אסלמהם אללה רבך בידך ואהאמהם אהאמה כבירה אלי אנפאד̇הם
ואסלם מלוכהם פי ידך פאבד אסמאהם מן תחת אלסמא פאן אנסאנא לא יקף בין ידיך אלי אן תנפד̇הם
ואחרקו פסול מעבודאתהם באלנאר ולא תתמן שיא מן אלפצ̇ה ואלד̇הב אלתי עליהם פתאכ̇ד̇ה לך כילא תוהק בה פאנה כריהה אללה
ולא תדכ̇ל מא יכרהה אללה אלי ביתך ותכון מתלופא מת̇לה בל רג̇סה תרג̇יסא ואכרהה כריהה אד̇ הו מתלוף