ואלאן יא אסראיל אסמע אלרסום ואלאחכאם אלתי אנא מעלמכם לתעמלו בהא לכי תחיו ותדכ̇לו ותחוזו אלבלד אלד̇י אללה אלאה אבאיכם מעטיכם
לא תזידו שיא עלי מא אמרכם בה ולא תנקצו מנה ואחפט̇ו וצאיא אללה רבכם אלתי אנא אמרכם בהא
עיונכם ראת ג̇מיע מא צנע אללה בפעור אלצנם אן כל רג̇ל אתבעה אנפד̇ה אללה רבכם מן בינכם
ואנתם אללאזמון טאעה אללה רבכם כלכם אחיא אליום
אנט̇רו קד עלמתכם רסומא ואחכאמא כמא אמרני אללה רבי לתצנעוהא פי אלבלד אלד̇י אנתם צאירון אליה לתחוזוה
פאחפט̇והא ואעמלו בהא פאנהא חכמתכם ופהמכם בחצ̇רה אלאמם אד̇א הם סמעו הד̇ה אלרסום יקולו יקינא אן הד̇א אלקביל אלכביר שעב חכים פהים
לאן אית אמה כבירה להא אלאה קריב אליהא כאלאלאה רבנא מנא מתי מא דעונאה
ואית אמה כבירה להא רסום ואחכאם עאדלה כג̇מיע הד̇ה אלתוריה אלתי אנא תאליהא עליכם אליום
וכ̇אצה אחתרס ואחפט̇ נפסך ג̇דא כילא תנסא אלכלאם אלד̇י ראתה עינאך ויזול מן קלבך טול איאם חיאתך בל ערפה לאבנך ואבן אבנך
פי יום וקפת בין ידי אללה רבך ענד חרב חין קאל אללה לי אג̇מע לי אלקום חתי אסמעהם כלאמי לכי יתעלמו אן יכ̇אפוני טול אלאיאם אלתי הם מקימון עלי אלארץ̇ ויעלמו בניהם
פתקדמתם ווקפתם אספאל אלג̇בל ואלג̇בל משתעל באלנאר אלי כבד אלסמא יחיט בה סואד אלגמאם ואלצ̇באב
פכלמכם אללה מן לדן אלנאר פכנתם סאמעין אלכלאם ושבהא לא תרון סוי אלצות פקט
ואכ̇ברכם בעהדה אלד̇י אמרכם אן תעמלו בה והי אלעשר כלמאת וכתבהא עלי לוחי אלחג̇ארה
ואמרני אללה פי ד̇לך אלוקת באן אעלמכם רסומא ואחכאמא תעמלוא בהא פי אלבלד אלד̇י אנתם צאירון אליה לתחוזוה
פאחד̇רו ג̇דא עלי נפוסכם פאנכם לם תרו שבהא פי יום כ̇אטבכם אללה פי חרב מן וסט אלנאר
לילא תפסדון פתצנעון לכם פסלא עלי שכל כל שכ̇ץ מן ד̇כר או אנתי
או שכל מן בהאים אלארץ̇ או שכל מן אלטאיר ד̇י אלג̇נאח אלד̇י יטיר פי אלסמא
או שכל ממא ידב עלי אלארץ̇ או שכל מן אלסמך אלד̇י פי אלמא תחת אלארץ̇
כילא תרפע עיניך אלי אלסמא פתנט̇ר אלשמס ואלקמר ואלכואכב וג̇מיע נג̇ום אלסמא פתזול ותסג̇ד להא ותעבדהא אלתי בת̇ נורהא אללה רבך לג̇מיע אלשעוב אלד̇ין תחת ג̇מיע אלסמא
ואנתם אצטפאכם אללה ואכ̇רג̇כם מן שביה בכור אלחדיד מן מצר לתכונו לה שעב צפוה כהד̇א אליום
ואד̇ קד וג̇ד אללה עלי בסבבכם וקסם לילא אעבר אלארדן ולא אדכ̇ל אלבלד אלג̇יד אלד̇י מעטיך אללה רבך נחלה
ואנא מאית פי הד̇א אלבלד לא אעבר אלארדן ואנתם עאברוה פתחוזון ד̇לך אלבלד אלג̇יד
פאחד̇רו אן תנסו עהד אללה רבכם אלד̇י עהדה מעכם פתצנעו לכם פסלא שבה כל מא נהאך ענה אללה רבך
לאן עקאב אללה רבך נאר אכלה הו אלטאיק אלמעאקב
ואד̇א אולדתם בנין ובני בנין ועתקתם פי אלבלד פאפסדתם באן עמלתם פסלא מן כל שבה ופעלתם אלשר בין אללה רבכם ואסכ̇טתמוה
קד אשהדת עליכם מן אליום אלסמא ואלארץ̇ אנכם סתבידון סריעא מן אלבלד אלד̇י אנתם עאברון אלארדן אליה לתחוזוה ולא תטול מדתכם פיה בל אנפאד̇א תנפד̇ון
ויבדדכם אללה פי מא בין אלאמאם ותבקון רהט ד̇ו אחצא פימא בין אלאמם אלד̇ין יסוקכם אללה אלי ת̇ם
ותכ̇דמון ת̇ם אלהה מן צנעה אידי אלנאס מן חג̇ר וכ̇שב מא לא תבצר ולא תסמע ולא תאכל ולא תשתם
פאטלבו מן ת̇ם אללה רבכם תג̇דוה ואלתמסה מכ̇לצא בכל קלבך ונפסך
ואד̇א צ̇אק בך ונאלך ג̇מיע הד̇ה אלאמור פי אכ̇ר תלך אלאיאם תב אלי אללה רבך ואקבל אמורה
לאן אללה רבך טאיק רחים לא יכ̇ליך ולא יהלכך ולא ינסא עהד אבאיך אלד̇י קסם בה להם
ואלאן פסל ען אלאיאם אלאואיל אלתי סלפת מן קבלך מן יום כ̇לק אללה אדם עלי אלארץ̇ ומן טרף אלסמא אלי טרפה הל כאן קט מת̇ל הד̇א אלאמר אלעטיים או סמע מת̇לה
והל סמעת אמה צות אללה מכלמהא מן דאכיל אלנאר כמא סמעת אנת פעאשת
או רפע אללה עלמא באן טיהר פתכ̇לץ לה אמה מן בין אכ̇רי באעלאם ואיאת ובראהין ומלחמה ויד שדידה וד̇ראע ממדודה ומכ̇אוף כבירה כמא צנע לכם אללה רבכם במצר בחצ̇רתכם
פאנת יג̇ב עליך אן תעלם אן אללה הו אלאה לא גירה ולא סואה
ומן אלסמא אסמעך צותה ליודבך ועלי אלארץ̇ אוראך נארה אלעט̇ימה וסמעת כלאמה מן דאכ̇ל אלנאר
וד̇לך בעד מא אחב אבאך ואכ̇תאר נסלהם מן בעדהם ואכ̇רג̇ך ברצ̇איה בקולה אלעט̇ימה מן מצר
ליקרץ̇ אממא אכבר ואעט̇ם מנך מן בין ידיך וידכ̇לך ויעטיך בלדהם נחלה כמא תרי אליום
פאעלם ד̇לך וארדדה פי קלבך אן אללה הו אלאלאה פי אלסמאואת אלעליא ואלארץ̇ אלספלי לא סואה
ואחפט̇ רסומה ווצאיאה אלתי אמרך בהא אליום לכי יכ̇אר לך ולבניך מן בעדך ותטול מדתך פי אלבלד אלד̇י אללה רבך מעטיך טול אלזמאן
חיניד̇ אפרד מוסי ת̇לאת̇ קרי פי ג̇אנב אלארדן אלשרקי
ליהרב אליהא כל קאתל יקתל צאחבה בגיר קצד והו גיר שאני לה מן אמס ומא קבלה פיהרב אלי ואחדה מנהא פיחיא
פבצר פי אלסהל מן אלבריה מן בלד ראבן וראמות פי אלג̇רש מן בלד גד וגולן אלבת̇ניה מן בלד מנשה
והד̇ה אלשריעה אלתי תלאהא מוסי עלי בני אסראיל
והד̇ה אלשואהד ואלרסום ואלאחכאם אלתי אמר בהא מוסי בני אסראיל אלכ̇ארג̇ין מן מצר
פי ד̇אך ג̇אנב אלארדן פי אלואדי ממא ילי בית פעור פי בלד סיחון מלך אלאמוריין אלמקים פי חשבון אלד̇י קתלה מוסי ובנו אסראיל פי כ̇רוג̇הם מן מצר
פחאזו בלדה ובלד עוג מלך אלבת̇ניה והמא מלכא אמוריין אללד̇ין פי ג̇אנב אלארדן אלשרקי
מן ערוער אלתי עלי שאטי ואדי ארנון ואלי ג̇בל שיאון הו חרמון
וג̇מיע אלגור ג̇אנב אלארדן אלשרקי אלי בחירה טבריה תחת מצב אלקלעה