לא יתזוג̇ רג̇ל זוג̇ה אביה ולא יכשף כנף אביה
לא ידכ̇ל מפדוג אלכ̇צי ומקטוע אלאחליל פי ג̇וק אללה
לא ידכ̇ל זנים פי ג̇וק אללה חתי אלג̇יל אלעאשר מנה לא ידכ̇ל פי ג̇וק אללה
ולא ידכ̇ל עמאני ומואבי פי ג̇וק אללה חתי אלג̇יל אלעאשר לא ידכ̇ל מנהם פי ג̇וק אללה אלי אלאבד
בסבב מא לם ילתקוכם באלכ̇בז ואלמא פי אלטריק פי כ̇רוג̇כם מן מצר ואלד̇י אסתג̇אר עליך בלעם אבן בעור מן פתור ארם נהרים לילענך
ולם ישא אללה רבך אן יקבל מן בלעם בל קלב אללה רבך לך אללענה ברכה למא אחבך אללה רבך
פלא תלתמס סלאמהם וכ̇ירהם טול זמאנך אבדא
לא תכרה אלאדומי פאנה אכ̇וך ולא תכרה אלמצרי פאנך כנת גריבא פי בלדה
ואלג̇יל אלת̇אלת̇ מן אלבנין אלד̇י יולדון להם ידכ̇לון פי ג̇וק אללה
ואד̇א כ̇רג̇ת פי עסכר עלי אעדאיך פאחתרס מן כל אמר קביח
ואן כאן פיכם רג̇ל ליס הו טאהר מן עארץ̇ אלליל פליכ̇רג̇ אלי כ̇ארג̇ אלעסכר מן חית̇ לא ידכ̇ל אלי וסטה
פאד̇א כאן ענד אתג̇אה אלליל ירחץ̇ באלמא וענד דכ̇ול אלשמס ידכ̇ל אלי אלעסכר
וליכן לך מכאן מן כ̇ארג̇ אלעסכר תנזל הנאך כ̇ארג̇א מנה
וליכן לך ותד מע סלאחך פאד̇א תברזת כ̇ארג̇א מנה פאחפר בה ועד וגט ד̇לך אלרג̇יע
לאן אללה רבך נורה סאלך פי וסט עסכרך ליכ̇לצך ויסלם אעדאך בין ידיך פיכון עסכרך מקדסא ולא ירי פיך אמרא קביחא פינצרף ענך
לא תסלם אלעבד למולאה אלד̇י יתכ̇לץ מן דינה בל תמנה מעך
וליג̇לס ענדך פי מא בינך פי אלמוצ̇ע אלד̇י יכ̇תארה פי אחד מחאלך פי אלאצלח לה ולא תצ̇הדה
לא תכן מן בנאת אסראיל ממתעה ולא מן בני אסראיל ממתע
לא תדכ̇ל שיא מן אג̇עאל אלזנא ואת̇מאן אלכלאב אלי בית אללה רבך פי נד̇ר לאן אללה רבך יכרההמא ג̇מיעא
ולא תעאין אכ̇אך עינה פצ̇ה ולא טעם וכל אמר יעאין
בל אלגריב תעאינה ואכ̇וך לא תעאינה לכי יבארך לך אללה רבך פי ג̇מיע ממדוד ידך פי אלבלד אלד̇י אנת דאכ̇ל אליה לתחוזה
ואד̇א נד̇רת נד̇רא ללה רבך פלא תוכ̇ר אלופא בה לאן אללה רבך יטאלבך בה מטאלבה פתחל בך עקובה
ולו אנתהית אולא מן אלנד̇ר לם תחל בך עקובה
אלאן מא כ̇רג̇ מן שפתיך אחפט̇ה ואעמל בה כמא נד̇רת ללה רבך מתברעא מא קלתה בפיך
אד̇א אסתוג̇רת פי כרם צאחבך פתאכל ענבא אלי אן תשבע ופי אניתך לא תג̇על שיא
ואד̇א אסתוג̇רת פי סנבל צאחבך פאקטף מא תפרכה בידך ומנג̇לא לא תחרך עלי סנבל צאחבך לנפסך