ואד̇ אנתם אוליא אללה רבכם כאלבנין פלא תתכ̇דשו ולא תג̇עלון נתפא בין עיונכם עלי אמואתכם
לאנך שעב מקדס ללה רבך ואכ̇תארך אן תכון לה אמה כ̇אצה מן ג̇מיע אלאמם אלתי עלי וג̇ה אלארץ̇
לא תאכל כל מכרוה
הד̇ה מא תאכלו מן אלבהאים אלבקר ואלצ̇אן ואלמאעז
ואלאיל ואלט̇בי ואליחמור ואלועל ואלארוי ואלת̇יתל ואלזראפה
וכל בהימה מט̇לפה בט̇לף ומפרקה תפריקא אט̇לאפהא ומצעדה אג̇תראר מן אלבהאים פכלוהא
כ̇לא הד̇ה אלאשכ̇אץ פלא תאכלוהא מן מצעדי אלאג̇תראר ואלמט̇לפה באט̇לאף מפרקה אלג̇מל ואלארנב ואלובר אנהא מצעדה אלאג̇תראר וג̇ר מט̇לפה בט̇לף והי מחרמה עליכם
ואלכ̇נד̇יר פאנה מט̇לף בט̇לף ולא יג̇תר והוא מחרם עליכם לא תאכלו לחומהא ולא תדנו מן נבאילהא אלא תנג̇סו
והד̇א מא תאכלו מן ג̇מיע מא פי אלמא כל מא לה אג̇נחה ופלוס פכלוה
וכל מא ליס לה אג̇נחה ופלוס פלא תאכלוה והו נג̇ס לכם
כל טאיר טאהר פכלוה
והד̇ה אלאשכ̇אץ פלא תאכלוהא מן אלטאיר אלנסר ואלעקאב ואלענקא
ואלג̇ארח ואלצדא ואלחדא באצנאפהא
וג̇מיע אלגראביב לאצנאפהא
ואלנעאמה ואלכטאף ואלסאף ואלבאז באצנאפהא
ואלבום ואלבאשק ואלשאהין
ואלקוק ואלרכ̇ם ואלזמג̇
ואלצקר ואלבבגא באצנאפהא ואלהדהד ואלכ̇פאש
וג̇מיע דביב אלטאיר אלד̇י הו מחרם עליכם לא תאכלוה
וכל מא הו טאיר טאהר מנה פכלוה
ולא תאכלו שיא מן אלנבאיל בל אעטהא ללגריב אלד̇י פי מחלך פיאכלהא או תביעהא לאג̇נבי לאנך שעב מקדס ללה רבך לא תטבך̇ לחמא בלבן
עשרא תעשר ג̇מיע גלה זרעך מא תנבתה אלצחרא סנה סנה
וכלה בין ידי אללה רבך פי אלמוצ̇ע אלד̇י יכ̇תארה ליסכן נורה פיה עשור ברך ועצירך ודהנך ובכור בקרך וגנמך לכי תתעלם כיף תעבדה טול אלזמאן
פאן טאל עליך אלטריק ולם תטק אן תחמלה ובעד ענך אלמוצ̇ע אלד̇י יכ̇תארה אללה רבך אן יג̇על נורה פיה ובארך לך מע ד̇לך
פבעה בת̇מן וצרה וכ̇ד̇ה פי ידיך ואמץ̇ אלי אלמוצ̇ע אלד̇י יכ̇תארה אללה רבך פיה
ואצרפה פי ג̇מיע מא תשתהי נפסך מן בקר וגנם וכ̇מר ונביד̇ וג̇מיע מא תחבה וכלה ת̇ם בין ידי אללה רבך ואפרח אנת ואהל ביתך
ואללוי אלד̇י פי קראך פלא תתרכה אד̇ ליס לה נציב ונחלה מעך
פי כל ת̇לאת̇ סנין תכ̇רג̇ עשור גלתך פי תלך אלסנה ותצ̇עה פי מחלך
פיאתי אללוי אד̇ ליס לה נציב ונחלה מעך ואלגריב ואליתים ואלארמלה אלד̇ין פי מחלך פיאכלון וישבעון לכי יבארך לך אללה רבך פי ג̇מיע מא תצנעה ידך